section and everything up till
*/ ?> Himanshi Parmar Archives - Shabdoni Sangathe

આંતર વ્યથા

 

વાત મારી હું એટલે સમજાવી શકતી નથી,
કે મહત્વનો મુદ્દો જ મોઢે લાવી શકતી નથી.

સંભળાવે સૌ તે નતમસ્તક સાંભળું છું એટલે,
કે મૌન હું મારું કોઈને સંભળાવી શકતી નથી.

જે થશે બદનામ, એ ચહેરા બધા પોતીકા હશે,
અનૃતનો પરદો તેથી જ હું હટાવી શકતી નથી.

ડૂસકાં ને મારા હું અંદર, ડૂમો કરી ખાળી શકું,
પણ અશ્રુની ભરતી ભીતર, શમાવી શકતી નથી.

કેવો હોય છે આ મોહ એ જરા સાંભળો તમે,
છે મૃત,ને છતાં સ્વપ્નોને દફનાવી શકતી નથી.

જાણું છું લખતી વેળા,આ કલમ કેટલી રડી છે,
આથી જ લખાણ પોતાનું વધાવી શકતી નથી.

હું બધાથી અલગ છું, તેને સારું કહું કે ખરાબ?
ધારું છતાં જાત,કોઈ સાથે સરખાવી શકતી નથી.

-Himanshi parmar

કેમ નથી?

સપનું ખરેખર તૂટીને થયું ચૂર, કંઇ વહેમ-બહેમ નથી,
ફરી સંધાય શકે એટલો પણ એ ચૂરો હેમ-ખેમ નથી.

આતો મારું સ્મિત છે જિદ્દિલું કે હોઠે પરાણે બેઠું છે,
અન્યથા, વક્ર સમયના પ્રહાર ચિત પર જેમ-તેમ નથી.

જ્યાં અડગ રહેવા ધારું ત્યાં જ બગાવત પર ઉતરે,
મારા થઇને,પણ અશ્રુઓને મુજ પર,રહેમ-બહેમ નથી.

આજ સુધી ભરમાવ્યા તેથી જ શ્વાસ ચાલે છે હજી,
સ્પષ્ટતા કરવાનું રહેવા દો, કે કોઈ પ્રેમ – બ્રેમ નથી.

ઘણું હોય નજરની સામે, છતાંય અદૃશ્ય રહેતું હોય,
જેની શોધમાં તમે ભટકો એ બધું કંઈ આમ-તેમ નથી.

સુખની એક પાંદડી,ને દુઃખના ટોપલા,આ કેવું જિંદગી!
સુખના હોય બાગ,ને દુઃખનું એક પાંદડું, એમ-કેમ નથી?

-Himanshi parmar

જીવન પંથી

શોધવાની આપણે વળી જરૂર ક્યાં છે?
ધારી જો લ્યો તો મંજિલ દૂર ક્યાં છે?

પોતે કંડારવાનો છે જુદો રસ્તો કે પગદંડી,
અહીં નકશાઓ કોતરવા મજૂર ક્યાં છે?

આવ્યા છો તો બધા રસની માણો મજા,
મધ સમી ફક્ત જિંદગી મધુર ક્યાં છે?

જેના કવેણ સાંભળીને ચડતી’તી ચાનક,
એ વિરોધીની વાણીમાં હવે સૂર ક્યાં છે?

પગલાંઓ થાક્યા છે, શ્વાસો હાંફ્યા છે,
એ હૃદયનો ઉન્માદ, આંખોનું નૂર ક્યાં છે?

છતાં સતત ચાલવાનું કારણ છે એ જ,
કે હારવું તો આજે પણ મંજૂર ક્યાં છે!

અળગી રહું છું, એ દોષ દેવાનું રહેવા દો,
મને તાણી જાય એ લાગણીનું પૂર ક્યાં છે?

🖊️Himanshi Parmar