section and everything up till
*/ ?> Ami Maheta Archives - Shabdoni Sangathe

માણસની રમતો

બંધારણ: ગાગાલગા×૪

હર માણસે માણસની સાથે અવનવી રમતો રમી,
આપી ઘણીયે ઓળખો, દુનિયાનાં સૌ ખૂણે ભમી.

કોશિશ ભલે લાખો કરી લો, મેળ બેસે ના કદી,
કોઈથી ના પૂરી શકાતી કોઈ માણસની કમી.

અનુભવ કરાવ્યો તો હવે પરિણામમાં એવું મળ્યું,
કડવી હકીકત ના ગમી, મીઠી સપન નગરી ગમી.

પ્રીતમ જો ને સામે ઉભો આજે તો પ્રત્યક્ષ રૂપથી,
મુસ્કાન હોઠે પ્રેમની, લજ્જા ભરી આંખો નમી.

સાચી પ્રણાલી જિંદગીમાં દિલથી અપનાવે અને,
વિશ્વાસ સાચો હોય ત્યાં વર્ષા બની વરસે “અમી”.

— Ami maheta

મશહૂર

બંધારણઃ ગાગાલગા*4

મુજ કાર્ય શૈલી આ જગતનાં લોકમાં મશહૂર થઇ,
સપનાને સમજી ના શકી, નાચી ઉઠી ચકચૂર થઇ.

મૃગજળ થયું જીવન હવે આગળ જતાં આભાસ છે,
આઘાત વર્ષાથી વહી ગઇ લાગણીઓ પૂર થઇ.

આંખે રહેલો સ્મૃતિ પટ પણ અશ્રુઓ ભેળો વહે,
અનુભવ ભર્યો બેડો છલક્યો પ્રીતથી ભરપૂર થઇ.

સંભાવનાની વાત કેવી ભિન્ન લાગે સત્યમાં,
કપરાં સમયમાં હારતી, હાલાતથી મજબૂર થઇ.

ઝાંખા પ્રકાશે ચોકમાં ચોમેર ગરબે ઘૂમતા,
હર ઘાઘરાની આભલીની એ ચમક તો નૂર થઇ.

– Ami maheta

લાચારી

બંધારણ: લગાગાગા×૪

જગત ઘૂમી શક્યા ના એ હતી કાયાની લાચારી,
હતી એ માન્યું પણ એને હૃદયમાં કેમ કંડારી?

દબાવી દે છે આજે લાગણીને ભોંયતળિયામાં,
છે કારણ એનું, ચારેબાજુ લોકો છે અહંકારી.

અપેક્ષા રોશની ક્યારેય ના જોઈ આ જીવનમાં,
ફકત જોઈ નયન સામે, છવાઈ રાત અંધારી.

કશો મતલબ નથી જીવનથી એમજ ભાગવાનો પણ,
હવે તો સ્થિતિમાંથી જીતવાની વાત સ્વીકારી.

પ્રભુનાં ધામની યાત્રાને ભૂલ્યો ભક્ત અવતારી,
ફરી માયા ને મૂડીમાં બન્યો સંપૂર્ણ સંસારી.

🖊️Ami Maheta