section and everything up till
*/ ?> હ્રદય રસ Archives - Shabdoni Sangathe

કેમ કરી દુભાણા

જખમ આપનારને જ વળી પાછા ઉજરડા દેખાણા,
બેશરમીની હદ વટાવીને પૂછે છે કેમ કરી દુભાણા?

સાથ એમનો કઈ તરાહનો હતો ચાલો એય જણાવું,
પાનખર આવે ને જેમ ખરી પડે જે વસંતમાં કમાણાં.

હું એકલી ઉથલાવતી રહી પાના કેટલુંક ઉકલવાનું?
સબંધના ચોપડાને ચડી ઉધી અને પડી ગયા કાણા.

સાંત્વનાની ખરીદી તો મારાં ગજા બહારની વાત છે,
પણ શું કરું મારી પાસે અશ્રુ રૂપી પડ્યા નથી નાણાં.

વીતેલી તિથિ તો કોઈ ‘દી બ્રાહ્મણ પણ નથી વાંચતા,
તો મરેલી પ્રીતિના હું વળી શું કામ ગાયા કરું ગાણા!

એમને વહેમ રહ્યો છેતરવાનો પણ હકીકત સાંભળો,
અમારે છેતરાવું ‘તું એની પાસે અમે એટલે છેતરાણા.

સૃષ્ટિ ખમળા “આરસી”

શું મળ્યું?

ખુદની ખેવના કર્યા વિના ખરપાઈ ગઈ આખી શું મળ્યું?
જાણે છે જરાય કદર નથી ત્યાં આશા રાખી શું મળ્યું?

એકની એક મુર્ખામી આ હરણી વારે વારે કરે એને પૂછો,
જાંજવાના દરિયામાં અરમાનની હોડકી નાખી શું મળ્યું?

નાનાની ગણતરી જ ક્યાં ચાંદના સગા છે બધા અહીંયા,
પેલા તારલાને પૂછો કે એને આખી રાત જાગી શું મળ્યું?

ના મળી રાધા તો કાનાએ રાસ ન રમવાના સોગંધ ખાધા,
વાંસળીને દેહ વિંધાવિ રોજ વનરાવનમાં વાગી શું મળ્યું?

એકલતા કડવી છે માન્યું પણ વિરહથી સો ગણી સારી,
પૂછો કોઈ પ્રેમીને કે આ પ્રેમનું ગળપણ ચાખી શું મળ્યું?

બહુ ઉતાવળ હતી સમજદાર બની દુનિયા સમજવાની,
‘આરસી’ હવે ગાંડપણ અને ભોળપણ ત્યાગી શું મળ્યું?

– સૃષ્ટિ ખમળ “આરસી”

તમને શું વાંધો?

આગળ રસ્તો નથી એ જ ગલીમાં વળું તો તમને શું વાંધો?
હું સૂરજ સાંજના બદલે સવારમાં ઢળું તો તમને શું વાંધો?

અષાઢ ઉમંગે ઉભરણો વાદળ ઘેરાય મારાં ઘરની મેડીએ,
હું સાવ કોરી રહુ કે રોમે રોમથી પલળું તો તમને શું વાંધો?

તમારા રિવાજના ચોગઠામાં ગોઠવાઈ ગઈ તો બધું ઠીક!
હું દૂધમાં સાકરની જેમ ના પણ ભળું તો તમને શું વાંધો?

આ બે હાથથી પ્રાર્થના થાય એ જ રીતે દુઆ પણ થાય,
હું રોજ મંદિરે ને આજ મસ્જિદે મળું તો તમને શું વાંધો?

ઉમર પાકતા વ્યવહારમાં પરિવર્તન આવવું જોઈએ, વાહ!
હું પરિપક્વતા જન્મારો આખો ના રળું તો તમને શું વાંધો?

તમે રાખો રાધાની ચૂંદડી, તમે રાખો રુકમણીનું ઘરચોળું,
હું માધવની મીરા ભગવામાં જળહળું તો તમને શું વાંધો?

જાણું છું કે ખોવાઈ ગઈ છું છતાંય રોજ મોજે દરીયા છે,
હું આરસી જાણી જોઈને ખુદને છળું તો તમને શું વાંધો?

🖊️Srushti Khamal